أوراق حـُــرّه : بالعاميه النصريه

أوراق حـُــرّه : بالعاميه

*******
( 1 )

*****
الأرض تهرب من تحت رجليا

والنحل يهرب م المناحل

يهجم عليّــا

ما عرفش ليه دايما بنستسلم

ونتساهل

وكأننا يا بحر فوق ساحل

أوغرقانين جوّاك

ساعة ما نسمع صوتك الساحر

نبتدى نجري وراك

ونبتدى نحـــــــلم

نحلــــــــــم

وكأننا يا بحر ح نهاجــــر

**********
***

أوراق بالعاميه

*******
( 2 )

************

لو تعرفينى

تعرفي إنى

دايما ً حزين

وبأنى أعمى النظر

زى اللى قبلي

واللى قبلي

باحلم

باحلم ببيت فوق القمر

بيت من شجر

أربي فيه عصافير

****

أوراق بالعاميه

*******
( 3 )

************

أنا كنت وسط الحبايب

آخر الأجيال

أقصد حبيب تالت

حبيب مهزوم

تاه العلاج وقت اللزوم

كل الطرق بتزوم

كل الشوارع .. هموم وهموم

صدقت نفسي بتعب

وقلت بافهم فى الأدب

شوفو التعاسه !!!!

طول النهار أعبي فى كتب

عنوان يقول :

الأحلام

عنوان يقول :

مشاعر الإنسان

والبحر ساكن جوا الحروف

والموج ما يعرف خوف

قلت أنا يمكن

حبيب تانى

مش أولانى

بس العلاج كان مستحيل

من غير حبيبتى باكون

انسان ضعيف وهزيل

قالو خلاص

يبقي حبيب أول

حبيب مهزوم

..........

........

ضاع الدوا وقت اللزوم

**********

أوراق بالعاميه

*******

( 4 )

************

نركب سفن الشوق

اللهفه

الرحله

ح نرحل

نمشي وخلف الضهر الزحمه

التوهه

الخلق

صوابع عين بصـّـاصه

لصـّـاصه

أرحل فيكى

وترحلى فيـّـا

ندخل جوا عروق العالم

يدخل دم عروقنا معانا

تنبت زهره عفـــيـّـه

تشبّ لفوق

توصل كتف الفجر الطالع منا نهار

أبيض زى حليب الحق

زى طهارة النار

راكب فوق المهره السمرا

حتى لجامها فى كف ايديه

ناقص يعرف رد سؤال

سؤال الحيره

وبكره يفوت

وبعده يفوت

شمـّـر عزمه

وبصّ في عينها

كانت عينها

زى بحيره كبيره من الأسرار

وف أحلامنا الطاهره اتوضت

زهرة نوح

خدنا ورقها

عملنا سفينه

رحنا جبال الذنب الشوك

باب البدر عيون مخنوقه

كدا عايشين حوالين الكون أحلام

نرمى الحلم حقيقه يبان

إلا طوفان الزيف الباهت

خدنا لمدن الخنقه معاه

**********
*****

أوراق حـُــرّه : بالعاميه

*******
( 5 )

يا أرق من همسه

يا أحنّ من نسمه

فيكى طيبة الأيام

فى عينيكى الشجر بينام

حتى كلامك ممزوج بالعسل

من غير كلام

انتى إيه ؟؟؟

لو كنت عارف إنتى إيه

كنت أقولك إنتى إيه

باهاجر فيكى لسكوتى

ف عينيكى لو تعرفي

شئ اختفى

لكن عينيكى بيوحشونى

فى ركن هادى

باحب افكر فيكي

باحب صوتك

مين اللى يقدر ياحدنى

ويقول :

بحبك موت يا بنت الإيه

.....

باحلم كتير بيكى

باحلم و باتخطى حدودالحلم

باحلم بيكي قمر

خبط على بابي

انتى نفسك قمر

مش حد غيرك

وقلت الف ياريت

بامنّى النفس بالمحال

انتى المحال

إنتى موطن القلب

وبؤرة الجمال

يا رمز السحر والجمال

**********

****

أوراق حـُــرّه : بالعاميه

*******
( 6 )

من أى ناحيه الوجع ؟؟

وف أى حته القلب بيصرّخ ؟؟

مليون سؤال يا ناس

ومفيش جواب نافع

كتر المشاهد علمتنى الفزع

والضرب فى الميت

والنفخ فى الواقع

وحاجات كتير

العقل بيها انخدع

وف عشـّـها بيتي

ولحضنها راجع

سايبانى دايما فى مكان واسع

للبرد والعتمه

باضرب دماغى فى جدار الحيط

باضرب

وباتمنى

ولا فيش جواب نافع

************

********

أوراق حـُــرّه : بالعاميه

*******
( 7 )

عطش الأيام الخايفه

زاد ولا قـلّ

يا دنيا ليه مش شايفه

حالى اللى ما له حلّ

***********

من غير ميعاد

عاد

ايده الشمال عوده

واليمين عوّاد

صحّي الأنين فيّ

صحصح فى ّ

عطش الأيام الخايفه

زاد ولا قلّ

يا دنيا ليه مش شايفه

حالي اللى ما له حلّ

********

علمتينى أقرا الكتاب

م الجلده للجلده

أحلم أشوف بكره

بكره يوفي العهد

لكن

عطش الأيام الخايفه

زاد ولا قلّ

والدنيا مش شايفه

حالى اللى ما له حلّ

******

انتى اللى مش عارفه

مين بيهواكى

انتى اللى مش عارفه

عطش الأيام الخايفه

اللى زاد ولا قلّ

وانتى اللى مش شايفه

حالى اللى ما له حل ّ

*********

أوراق حـُــرّه : بالعاميه

*******
( 8 )

كان الفتى راجل عجوز

عارف تاريخ الظلم من يومه

بيقولوا كان مجنون

وكان منبوذ

ومالوش قدم فى الشارع الخالى

وتمللى يحلم باللى نفسه فيه

يحلم كتير

وكأنه واقع جوا قعر البير

وتمللى يتكلم كتير عن يأسه

يضحك

كأن الطير بيضحك له

يبكى

كأنه بيفتكر منظر

مشهد

ومتصور

مؤلم أكيد

ساعة ما يسرح يبقي متحجر

زى اللى بيألف نشيده الأخير

كانت ملامحه بتكره التكشير

وكلامه متكسر

ينطق حروفه بلدغه معروفه

وشفايفه محدوفه

وسنانه مرصوصه

وعيونه زى النجم مرسومه

لما اتفرد ع الأرض زى السرير

قال الملك : لابد يتسمر

على حيطه واقعه فى طريق مهجور

طار الحمام

من شبابيك القصر

علشان يبلغ الخبر

والريح بتعوى فى البوادى والحضر

والنسمه والعه

والجبل شارد

والشجر ينشد

نشيد للمعبد الخالد

كان الحمام واقف وبينقر

والكل بيشاهد نزول المطر

يبكوا عليه وكأنهم واحد

كتبوا له اسمه فى أول الشاهد

كتبوا له بالخط العريض :

أجمل شهيد فى ساحة الحريه

******

***

أوراق حـُــرّه : بالعاميه

*******
( 9)

احنا لازم نتولد

ننتشل من بين نفوسنا

نتغسل من كل طيشنا

من سنين قهر وكمد

احنا لازم نتولد

احنا لازم نبقي احنا

ريحنا عاتى بيمازحنا

نبقي ضحكة نيل نبيل

نبقي نجمه ف قلب ليل

لازم نكون

ونبقي لبعض السند

احنا لازم نتولد

************
******

أوراق حـُــرّه : بالعاميه

*******
( 10 )

*****
القضيه

حمام وغيّــه

زنود عفيـّـه

وضحكه بكره

من بدري جايـّـه

أما القضيه

تبقي القضيه عمل وعباده

تبقى القضيه قلوب جوّاده

تبقي القضيه أمل وإراده

قلوب قويه

هى دى أصل القضيه

كل القضيه

**********

*****

» أوراق ..........
» أوراق الآلهة المصرية
» أوراق الكاتب : جون أبدايك
» فيلم تزوير في أوراق رسمية
» الظواهري لا يقرأ أوراق الحقيقة