"هو البتاع المحترم يطلع جبان؟!"

الأرض نفس الأرض
والمجد لجنابك
والموت شهادة فخر
لو كان عند بابك
والقوت يهون بالذل
لو كان من رحابك
يا صاحب الصون والعفاف
"درّجْ حرابك"
واجمع صحابك م المدى
وقيّد كلابك
وامسح ملامح حلمنا
من فوق تيابك
وافرش ترابك ع السكك
وازرع خرابك
وارفع رايات القهر
واطلقنا فى شعابك

2

الأرض نفس الأرض
والموت للشيطان
الأرض نفس الأرض
والموت للملك والصولجان
للصمت والخوف والأفاعى
اللابده فى شقوق الحيطان
للمارد الواقف
يحارب حلمنا ف وسط الميدان
للواحد الفرد
اللى جاب من ضهره ذرية تيران
يا صاحب الصون والعفاف
يا فاقد النور والإيمان
يا مركّب الموز –ع- البلح
ومطلع التوت برتقان
يا معلّق الإعجاز فى حلقان الودان
يا معلم الناس تلعنك
ومسجّد الناس ع البيبان
يا زارع الموت فى الجتت قبل الأوان
طالعين عشان نستجوبك
يا رب أرباب البيان
هو البتاع المحترم يطلع جبان؟!
واللا البتاع المحترم
يطلع عميل للأمريكان؟!

3

الأرض نفس الأرض
والخوف عنكبوت
والصمت طارح صمت
فى جيوب البيوت
والحلم ساجن خطوته
ف عب التابوت
يا صاحب الصون والعفاف
والخصخصة والبنكنوت
انت اللى خلّيت العيال الطيبه
تخاف م الكلام
وانت اللى خليت الغيطان الطيبه
تحب السكوت
وانت اللى خليت النشيد المر
يتحول لصوت
وانت اللى علمت الملايكه الخط
وقراية الخطوط
وانت اللى شقيت السما والبحر
والنيل بالريموت
وانت اللى جبت الاغبيا معاك من هناك
وانت اللى سبت الاغبيا يسوقوا اليخوت
وانت اللى رسيت
ربك الأعلى بإيديك ع الشط فاحتل الشطوط
وانت اللى واقف ع القضيب
تنزف ومش عارف تموت

4

يا صاحب الصون والعفاف
يا سَيِّد الأسياد
وسِيد الطيّبين
المجد عمره ما كان
لقطاع الطرق والهجّامين
المجد عمره ما كان
لتجار الوطن والكدابين
المجد عمره ما كان لشيخ البصاصين
ولا عمره كان للى انحنى
وقال لك آمين
ولا عمره هيكون
للى داس فوق حلمنا وشيّلنا طين
يا سَيِّد الأسياد
وسِيد الطيّبين
المجد للشعب المتين
المجد للشعب...
اللى طالع ينحنى للميتين
المجد للشعب...
اللى فجّر ثورته بسورة "يس"
المجد للمارد كريم العنصرين
-المجد لله فى الأعالى-
وفى السما للمؤمنين