الامير سلمان بن عبد العزيز منقول

ولي عهد السعودية من الغانمين = حرٍ من اللي فعلهم يسبق أقوالها
عضيد قائد مسيرتنا في دنيا ودين = صقر العروبة وستر الدار وظلالها
مليكنا صادق النيّات ذرب اليمين = درع الوطن من هل الفتنه وجهّالها
وسلمان رجل المواقف كل حزّه وحين = قول وفعل يوم كلٍ تذكر أفعالها
ورجل المهمات في الشدّات عبر السنين = على العهد راعي المهرة وخيّالها
تاريخ حافل بفعل الخير للخيّرين = يبني على ساس والقالات يعنا لها
نصير من لا معه حيله في الطامعين = ما همته لا مناصبها ولا مالها
يا سيدي ندري إن الدمع في كل عين = والحزن خيّم على أهل الدار وعيالها
نايف خذاه القدر والموت حق ويقين = ما فيه نفسٍ تبي تبقى على حالها
في جنة الخلد بإذن الله مع الصالحين = ويرحم جميع العباد ويصلح أحوالها
وحنا علينا الصبر والله مع الصابرين = ويجبر عزانا في قومٍ شدّت إرحالها
وأنتم حماه الوطن من سائر المعتدين = من شرقها للجنوب وغرب وشمالها
شرّفكم الله بخدمة قبلة المسلمين = ومسجد رسوله وطيبة وكل من جالها
شريعة الرب وآيات الكتاب المبين = دستور قادة وطنّا والسعد فالها
تضرب بسيف العدالة كل مجرم لعين = ولا يدنّس تراب الأرض ورمالها
بالحق تردع وتقطع دابر المفسدين = واللي تنكر ليمنى الخير وأفضالها
خان الأمانة وغرّد في سما الجاحدين = يحلم بثروة يجمّعها ويشتالها
ويحلم في قلعه مبانيها على شارعين = وعين الحسد في عيال العم وخوالها
و جلسه خبيثة وربعه كلّهم حاضرين = بيع وشرا والبضاعة عند دلاّلها
من وين وعيال أخو نوره لهم واقفين = وأحلام قوم الردى ما يطلع هلالها
عاشوا على طاعة الله مع رضا الوالدين = و ما خاب من يزبن آل سعود في حلالها
الرأس ما يخضع إلا لأرحم الّراحمين = ولا تسجد إلا لوجهة منشي خيالها
والكلمة الطيبة من عادة الطيبين = والعفو في المقدرة من صادق أعمالها
الشعب يا سيدي تحت أمرك جاهزين = من دون دار الشرف ما تقصر حبالها
والأمن في بلادنا وجنودكم ساهرين = أمن الوطن وأهلها ما غاب عن بالها
و حجاج بيته وزوّار البلد آمنين = لا خوف في ديره آل سعود ورجالها
والشعر يا سيدي لا جاء مجاله يزين = وفيض المشاعر تسابق موجة إرسالها
المدح في شخصكم يحتاج شاعر فطين = ما يمدح إلا هل الطالات وأبطالها
يسبح في سبع البحور وكل صيده ثمين = ويأخذ سمان العلوم ويترك حثالها
وقدام نظم القوافي كل قاسي يلين = وقصائده يشرب العطشان من جالها
أبيات حرّة صداها يطرب السامعين = ويدرى عليها من الهفوات بأشكالها
ما هي سوالف مجالس عارها في الجبين = من وين ما تبدي الخلاّت تسعى لها
يقولها شاعرٍ يزداد شوق وحنين = لمصافحة من فعوله مضرب أمثالها
وصلّوا على خير خلقه سيد المرسلين = شفيعنا من لهيب النار وأهوالها
وكل عام وأنتم بخير وجعلكم سالمين = بإذن الذي تحت حكمه ترسي جبالها