رسالة لصاحبي
-1 بعت رســـالة لاخويا وحبيبي رســـالة لصاحبي اللي ما تعرفوش
لكن أنا عارفه بقالي سنين
من قبل حتي ما ندخل مدارس
ومن قبل حتي ما أعرف دا مين
كنا بنحبي ونخبط في بعض
بدون أي قصد
شويه شويه كبرنا ولقينا
بتمسك إيدينا حيطانا القديمه
نشف عودنا حبه ودوسنا ومشينا
ايوه انا فاكـــر
كنا ف بيت كان يدوبك دورين
وكنا ف شارع في ناس طيبين
يراعوا المشاعر
ولا يدققوش انت مين وبن مين
وكنا أنا وصاحبي نلعب يوماتي
وكل الجيران تبقي عينهم علينا
يقع اجري اشيله انفض هدومه
أقع يجري هو ياخدني ف حضنه
وكانوا يشفونا وكانوا يسبونا
لغاية ما نتعب ونرجع لبيتنا
امه تاخدنا تدخلنا ناكل
وبعد ما ناكل ونشبع نحلي
ما كنتش اقول لها إلا ياخالتي
وهو يقول لامي برضو ياخالتي
وكان لما يطلع ويقعد معايا
من البرد نكمش وكنا ننام
تقوم امي بدري تحضر فطارنا
وقبل ما ينزل أبويا لشغله
يطل علينا يميل يبوسنا
ويسيب في إيد كل واحد بريزه
عارفنا بنشبط ف خالتي عزيزه
بتاعة البخوته
وكان ديمه بخته وبختي اونطه
إلا يدوب حاجة وحده جميلة
لما لاقيته علي التخته جاري
وكتفه ف كتفي
أخدني ف حضنه وخدته ف حضني
وقولنا لبعض ما حدش يجيبنا
ولا حد يستني تاني ياخدنا
نروح مدرستنا وإيده ف إيديا
ونرجع لبيتنا وعينه عليا
كنا نبص لبعض ونضحك
لو حد ينده ف مره علينا
ينده لصاحبي يا واد يا حماده
ويندهني أنا يقول لي يا مينا
ورغم كبرنا شويه مازالوا
بيحتاروا فينــــا
ما فيش حد حاول يفرق مابينا
اتنين غلابه علي قد حالنا
رماهم قدرهم ف قطر الحياة
ركبنا وزاحمنا ولما نزلنا
كل ما فينا نزل ف اتجاه ياااااااااااااااااهـ3
ما عدشي بإيدنا
رضينا بنصيبنا وعشنا الحياة
وادينا كبرنا وبقالنا عيال
وعدي زمانا رسم فوق وشوشنا
تجاعيد وآهـ
وذاد اشتياقي لخويا وصاحبي
رجعت بسرعة لبيتنا القديم
تهت ف شارعنا وقفت ساعات
كل البيوت اللي جارنا عمارات
وكل اللي اشوفه غريب الصفات
وزحمه وظيطه وعركه وآهات
طظ ف دا كله انا جاي لصاحبي
اللي اسمه مينــــا
وجاي لناس كان عنيهم علينا
ماحدش عرفني
عرفتني بس بتاعة البخوته
قالتلي محمد
قولتلها أيوه ياخالتي عزيزه
قالتلي رسالتك معايا اهي
تعالا معايا
نروح ندهالوا
مينا مستنيك تشوفه
قبل ما يغادر الكنيسه
الأحد 23 أغسطس 2020 - 16:00 من طرف 
موضوع: رسالة لصاحبي 
