مرثية زوجتى / ناديه من أشعاري القديمه

( 1 )

كان المـــــــنى تاخــــــــــــدى العــزا فيـّـا

يا نـــــــاديه غالى يا صـــــــــــــافية النيّـه

وتزورى قبرى وتقرى الفاتحه على روحى

وتراعى اهــــلك وأهــــــلى بكل حنيّـــــه

*******************

( 2 )

حبيتى كل الناس من أهــــل أو خــلان

ف ايديكى دايما ورد أو فــلّ أو ريحان

عمرك بحاله حب ما عرفتى يوم الكره

وكنتى بينــّا مناره وهدايــــه للحيران

( 3 )

وعشتى عمرك خدومه للـّي حواليكى

بتمرّضي العيان بالحب وايديكـــــــى

وتشرّبى العطشــــــان بالود والطيبه

علشان كدا دايما ربــــك بيرضيكـى

**************

( 4 )

وكنتى شمعه منـــــــــوره نورك بيهدينا

وكنتى ورده مفتحه عطـــــــرك بيشجينا

وكنتى عزه وكرامه مزروعه وسطـــينا

وكان وجودك ضرورى علشان بيحمينا

***********************

( 4 )

وكنتى شمعه منـــــــــوره نورك بيهدينا

وكنتى ورده مفتحه عطـــــــرك بيشجينا

وكنتى عزه وكرامه مزروعه وسطـــينا

وكان وجودك ضرورى علشان بيحمينا

***********************

( 5 )

مالك ومال النـــاس .. سايبه الأمور لله

لا يوم حسدتى ولا يوم طمعتى فى جاه

ولا يوم عرفتى الحقد : قلبك جنينة حب

واللى يكون زيّــك فى الآخره يا ماحلاه

...................................

( 6 )

راعيتى فينــــــا اللـــــه ولآخر المشــــــوار

وكنــــتى فيــنا الأمومـــــه بتشـّــع بالأنــوار

وكنتى صاحبة مروءه الواجب ما بيفوتكيش

أقسم بذات الـلـّـه إنـــــك مــــن الأبـــــــرار

( 7 )

ياما اتظلمتى كتيروتسامحى ظالمينك

كان السماح مذهبك والعفو كا ن دينك

الله يسامحك ويغفر ليكى .. سبحانه

وف منزله عاليــــه تلقى محبـــــــينك

( 8 )

رضيتي بالمقسوم ولربنـــــــــــا شاكره

ناطقه بحـــــمد اللـــــه ولنعمتـــه ذاكره

حتى الشكايه ما كانت تيجى بلسانــــك

ولا كنتى جاحـــــده يوم أبدا ولا ناكره

(9)

كريمة الأخــــلاق يا بايعه دنيــــاكى

الملـّـه مـلـّـة محــــمد والرب مولاكى

كان الصلا والصوم ويـّـا الزكا دينك

بالله قــولى مين فيـــنا ح ينســـــــاكى

( 10)

أنا مهمــــا أقول عنك .. واللهِ مهما أقول

برضه الكلام عاجز بالعرض أو بالطول

للحق أو للأمــــانه إنتى مثــــال نــــــادر

هى طبيعتك كدا .. ماهو انتى بنت أصول

11 )

راعيتى حق الله سبحـــــانه رب العبـــاد

وراعيتى حق الحيـــاه حتى ولو ف الذاد

وراعيتي حق الأهل والجيره والأصحاب

وراعيتى حق المــوت كنتى من العـُـبـّـاد

12

لما ابتلاكى الله كان الامتحان الصعب

وعشتى فيكى الألم م الراس لحد الكعب

صبرتى صبر الإبل .. ولا النبى أيوب

وكان إيمانك عميق بالله فى عمق القلب

( 13 )

وحدك وفيكى الألم فوق طاقــــــــة الإنسان

عمـّـال بينهش فى جسمك أشكال على الوان

واحنا ولا احنا هنـــا .. غيبوبه واخدانــــا

سبحانـــه من صبّـرك الواحد الرحمــــــــن

( 14 )

مهما يكون الألم شفتك جبـــــل راسي

كان الألم مفترس ظــــالم قوى وقاسى

مستحملاه ازاى ؟؟ وازاى بدون الآه ؟؟

لو كان فى جسمى أنا كان يا مرار كاسى

( 15 )

دخلتى فى الإمتحان فجأه بدون مواعيد

جاوبتى فى الإمتحان بإيمان قوى وشديد

جاوبتى صح الصح نـِـمـَـرِكْ نهائيــــــه

أما النتيجه فظهرت تانى يوم العيـــــــد

( 16 )

فى موكب الأبرار ح تكونـــى مسروره

فى الدنيا حظك قليل ف الآخره مجبوره

حاربتى كيد الشيطان بإراده وعزيمــــه

ونجحتى فى المعركه وطلعتى منصوره

( 17 )

مااحلاكى فى ضحكتك صـــــــافيه منديّـه

مااحـــــــلاكى ساعة الغضب برضه بحنيّه

ما احلاكى عمرك بحاله يا ناديه ما احلاكى

ج تنامى فى تربتك راضــيه ومرضيـــــــه

( 18 )

لما احتواكى التراب كان التراب مبســــوط

القبر نور وزهــــــــــور وكل شئ مظبوط

وملايكة الرحمــــــن حواليكى بيهـــــــــنوا

اسمك فى كشف الحور ماهو القدر مخطوط

( 19 )

يا ألف رحمه عليكى ياما احتملتى كتير

وصبرتى يا نــاديه صبرك عظيم وكبير

ثوابه عند الله يدخــــــــــل فى حسناتك

يبقى الميزان راجح أما الحسـاب فيسير

يا ألف رحمه عليكى ف ضيافة الرحمــن

يا ألف رحمه عليكى بالعفو والغفران

يا ألف رحمه عليكى يا ناديه يا غالى

يا ألف رحمه عليكى فى جنة الرضوان

************

م.منسي

» مرثية زوجتى / ناديه من أوراقى القديمه
» من أوراقى القديمه :مرثية زوجتى / ناديه
» مرثية زوجتى / ناديه من أوراقى القديمه
» من أشعاري القديمه : ذات الخفـــــر
» ((من أشعاري القديمه )) : حب ... و ... وفــــــــــاء