مسرحيه حكايات مصريه

مسرحيه حكايات مصريه

المشهد الاول

(فردان يعدان شاشه خيال الظل علي المسرح بالاشتراك مع 1 و 2 ثم يختفون وراء شاشه الخيال)

نديم: اتفرج يا سلام واتفرج يا سلام

حسن: الفين سلام للحاضرين ... اهل الكرم اهل المقام

1: اتفرج يا سلام علي حكايه من حكايات الزمان

2: ها نقدم لكم نوادر و حكم وعبر

نديم: وحقائق متشخصه فها الدرر

حسن: الليلادي فيه مشاهد

1: تعالي اوام يالا شاهد

2: هانقدم لكم مشاهد اربع مشاهد

نديم: كلها من التاريخ ابو الحكايات

حسن: اوعي تقول دا كان وفات

1: يالا بينا اوام نروح مشوار صغير

2: هانروح نشوف قريه مصريه

الجميع: انتو فاكرين الثورة العرابيه

حسن: اول مشهد ها يبتدي من بعد ما انتهت ثورة الزعيم (يتجمعون جنبا الي جنب) في القري كان يبلف واحد اسمه عبد الله النديم

1 و 2 : عبد الله النديم كان بيلف متخفي .. مرة تاجر.. مرة شيخ.. مرة مغربي.. مرة يمني.. النهارده عامل بتاع خيال ظل

نديم: انا عبد الله الندم

حسن: وانا حسن صاحبه وتابعه

1 و 2 : يالا نبتدي

نديم و حسن : يالا بينا (يدخلان وراء شاشه خيال الظل)

1: واحنا هانذيع الاعلان

2: اللي كان بيلف كل البلاد

(يخرجوا 1 و 2 بينما يدخل اهالي القريه وهم يتناقشون – وما هي الا لحظات حتي يدخل عليهم 1 و2)

1: الي كل اهالي كل القطر المصري

2: بامر الحضرة الخديويه ‘ صاحب الطلعه البهيه والنظرة السنيه

1: يعلن بان الجيوش البريطانيه قددخلت مصر المحروسه ‘ ليحصل الامن والنظام

2: وللقضاء علي عرابي واللي كانوا معاه

1:وقبضنا بحمد الله علي عرابي والمتمردين

2: فيما عدا المدعو عبد الله النديم

1و2: ويناء عليه

1: تعلن الحضرة الخديويه

2: عن مكافاة سخيه

1و2: قدرها الف جنيه

1: لكل من يقبض عليه

2: حيا او ميتا

1و2: والسلام ختام (يخرجان)

9: سمعت قالواايه في الاعلان ده

6: تفتكري النديم يجي بلد زي بلادنا دي

10: وايه اللي هايجيبه هنا بس

5: (ذاهبا مع 4 الي 3,8 ) اماالنديم ده ولد تمام التمام

4: يا عم دا مدوخ الحكومه

8: انتو مش واخدين بالكم يا جماعه ‘ الخيال ده جه امتي ؟

(المحموعه تتجمع كلها عند 3 و مسرحيه حكايات مصريه Icon_cool

3: دول بينهم نصبوه النهارده

9: امال فين المشخصاتيه

(من وراء الستار يخرج نديم وحسن ‘ تذهب المجموعه الهم ‘ يسالونهم هاتشتغلوا امتي؟ هاتعملوا ايه ؟ احكوا لنا حكايه حلوة ... الخ و في اثناء ذلك يدخل 13‘14 يتلصصان)

13: اهم يا عم ‘ صدقت ‘ لسه نازلين البلد من شويه

14: وفن النديم؟

13: اهو .. اللي واقف هناك ده وعامل مشخصاتي

14: ده بقه اللي مجنن الانجليز والخديوي والحكومه هيظهر كده عيان بيان

13: ماهو متنكر

14: اقطع دراعي لوكان ده عبد الله النديم

13: انت مخبر لسه صغير انا قديم في الشغلانه دي ‘ والتنكر بتاعه ده مايخيلش عليا

14: مهما كان متنكر برضه مايظهرش كده ف وسط البلد

13: بص بأه ‘ انا متأكد ان ده هو عبدالله النديم ‘ وهاروح ابلغ المأمور . يس خلي بالك الالف جنيه تبقي من نصيبي وحدي

14: وان ما طلعش هو

13: بقي مقلب وشربناه (يخرج)

14: الله ... ليكون كلامه صحيح ‘ لأ بأة لازم اتأكد ‘ الله يدوخك يا ندبم زبمانت مدوخنا .. هاندس وسطيهم... دول الف جنيه ياعم (ينضم اليهم بينما ينهي نديم وحسن الاتفاق مع المجموع)

الجميع: خلاص اتفقنا

9: يالا اشتغل..واحنا هانقعد نتفرج

(تجلس المجموعه يبدإ نديم وحسن التمثيل امام الشاشه ثم يكملان ورائها )

نديم : اتفرج يا سلام ‘ هانقول ع اللي كان ف اقرب الازمان

حسن: يعني هانشخص عرابي وبشاعه الطغيان

14: واشمعني الحكايه دي بالذات ماحنا عارفينها

حسن: فيها المعاني فيها العظات .. وبعدين اهي حكايه من الحاكايات

نديم:وبعدين مالها حكايه عرابي؟

الجميع: (ل 14) اه صحيح مالها حكايه عرابي (14 يخاف)

5: يا عم يالا .. اتكل علي الله

حسن: (لنديم) البس ملابس عرابي.. مين يلعب الخديوي.. مين يلعب المستار الانجليزي.. (يختار من بينهم من يمثلون معه) (يدخلون جميعا وراء الستار ‘ الجزءالتالي وراء شاشه الخيال)

الخديوي: ايه سبب لمه كل العساكر دي عرابي باشا

عرابي: العساكر دي ليها مطالب يا جناب الخديوي

المستشار: دا تمرد عسكري جناب خديوي

الخديوي: امان ربي امان.. نتصرف ازاي جناب مستشار

المستشار: نحاكمهم

عرابي: احنا طالبين الحق و الانصاف للامه كلها يا جناب الخديوي

الخديوي: انتظر عرابي باشا مش تقاطع مشاورات مع مستشار بريطاني

المستشار: دا تمرد عسكري جناب خديوي .. نحاكمهم

الخديوي: لا لا .. محاكمه خطأ شوف حل تاني افنظم

المستشار: (يشير الي رقبته باشارة يفهم منها عمليه القتل)

الخديوي: مستحيل افنظم .. فيه ناس كتير مع عرابي

المستشار: عيب خديوي جيش بريطاني كله معاك جناب خديوي

الخديوي: عفارم عليك . تعالي عرابي . ماذا تريد؟

عرابي: عزل الوزاره المستبده – تكوين مجلس نيابي – اصلاحا حوال الجيش ودي مطالب الامه ياجناب الخديوي

الخديوي: امان ربي امان .. مستحيل عرابي باشا مستحيل.. بلد دي بتاعتي انا .. وارثه انا عن جدي محمد علي باشا .. فلاحين دول عبيد عندي انا

عرابي: متي استعبدتم الناس وقد ولدتهم امهاتهم احرار

المجموعه المشاهده: الله عليكم الله .. ايوة كده.. قول يا عرابي قول

(ينسحب 14 وحده بعيدا عنهم ) (بينما يستمر الخيال في العرض)

14: يا ولاد الابالسه .. ميه فيي الميه الواد اللي قايم بدورعرابي ده هو عبد الله النديم ..يا نهار زي بعضه.. الالف جنيه (وبينما هو يستعد للخروج للابلاغ عن وجود النديم – يدخل المأمور ومعه 13 )

المأمور: ستوب .. وقف خيال

المجموعه المشاهده: فيه ايه.. حصل ايه.. خير يا جناب المأمور...

المأمور: ويرز نديم ؟where is nadeem

الجميع: نديم مين.. نديم ايه.. وايه اللي هايجيبه هنا (نديم وحسن وغيرهم يخرجون من وراءالستار)

نديم: نديم مين يا بيه ... هو فين نديم ده

حسن: دا احنا لو قابلناه كنا اول ناس تقبض عليه ... دول الف جنيه يابيه واحنا اول ......

المأمور: شش... نو no مش تخيل عليا حركات دي

نديم: يا بيه داحنا مشخصاتيه غلابه لا لينا ف ده ولا ف ده دا احنا حتي معانا شويه من اهالي البلد اهم

(المأمور لا يقتنع يدخل عليهم ووراءه 13 و 14 بغي شرا فينكمشون ويتراجعون يلف المأمور ووراءه 13 و 14 حول المجموعه لفه فيها شك ولذا فأن المجموعه تهرب منه بينما يظل هو يلف حولها حتي يبنتهي الموقف في اقصي الجانب الامين من مقدمه المسرح حيث يأمر المأمور المخبران 13 و14 ان يوقفوا الاهالي صفا واحدا فينفذون الامر قيتقدم المأمور ويمسك بنديم ويجعله بخطو خطوة للامام وكذلك يفعل مع حسن ثم يقف في مواجهه الصف وراءه المخبران)

المامور: نديم ازيو اوريو NADEM IS YOU OR YOU

(بسرعه يخطف الاهالي نديم وحسن ويحيطون بالمخبران 13و 14 ثم يصنعون حاجزا بين نديم وحسن والمأمور لكن المأمور يدورفي تلك الاثناء يخرج 1 و 2 الي مقدمه المسرح)

1: تفتكري الناس مش حاسه ان اللي قام بدور عرابي هو عبد الله النديم

2: دول مش حاسين وبس دول متأكدين

1و2: ومع ذلك يا ساده يا كرام

1: محدش فيهم فكر في الالف جنيه

2: وبدون تفكير اتطوعوا للدفاع عنه من نفسهم

1: اتطوعوا يداروا عليه ... يحموه

2: دول مش كده وبس .. دول ساعدوه عشان يسبك الدور

7: ايه باشا انت خدتها جد ولا ايه...

5: دا تياتروا .. ايه معندكش تياتروا في بريطانيا

3: اه تياتروا .. كله تمثيل في تمثيل.. حتي شوف

الجميع: اتفرج يا سلام .. واتفرج يا سلام.. قولوا ورانا يا سلام

9: تعالي شوف واتفرجز.. يالا يا جدعان فرجوه

(يدخل نديم وحسن وراء شاشه الخيال ويبدا الاهالي في التشخص بدلا منهم اثناء التشخص يري نديم وحسن وهو يهربون والمجموعه حريصه ان تشغل المأمور كي لا يراهم وههم يهربون – المشهد التالي قصير ويجري وراء الخيال – والمجموعه تلفت نظر المأمور لما يحدث)

9: شوف عرابي باشا اسمع .. انت ليه تزعل خديوي من جنابك

8: انا مش عاوز ازعله

9: لا لا انت عارف ان المطالب دي مستحيل

(الذين يقفون مه المأمور يشكرون 8 و9 )

الجميع: ثانك يو فري ماتش THANK YOU VERY MATCH

7: شفت جنابك كله تمثيل .. ماتيجي تلعب

3و4: تياتروا جميل

المأمور : اسمع ولد انت وهو فين نديم

الجميع: نديم ... (وهم يخرجون) في الباي باي يا باشا

المشهد الثاني

(ابراج حمام علي المسرح يلف حولها اطفال بغنون (طير يا حمام البني....) علي الابراج زينه افراح ..حبال نور.. اعلام زينه ايضا خيال الظل فيظهر فيها ابراج الحمام والحمام يطير حولها – تنخفض الاغنيه تدريجيا – يدخل 1و2 بينما تقف المجموعه 1 3و4 و5 و 7 و8 و9 مجموعه اولاد 2 و6 و10و11 مجموعه بنات)

1: ولسه ياساده يا كرام عندنا مشاهد كتير

2: بس المهم هو اللي جوه المشاهد

1: واتفرج يا سلام ع الكلام التمام

2: واتفرج يا سلام علي ابراج الحمام

1: لف بعينك ودور

2: هتلاقي حمام طاير

1: هتلاقي يمام بيدور

2: طاير في سلام.. في حب.. في سرور

1: حولين الابراج شايف حبال نور (تضيء حبال النور)

2: واتلم الحمام فوق الابراج يبص

1: كان الاهالي متجمعين في عرس

1و2: احنا كمان رايحين نبص

5: مهرك يا عروسه مهما كان كتير والله... لازيد عليه لغايه ما قلبك م الفرحه يطير (يدفع المهر الي 7)

7: جهزوا الركايب هانروح دسوق

6: بس خلوا بالكم.. الفرنساويه دايرين ع الحدود

10: حوالين رشيد... حوالين دسوق

3: واحنا يهمنا

9: برضه هانجهز العرايس...

8: هانرجع شاريين احلي جهاز .... يالا يا جماعه(يذهب ليأخذ 3و9)

(يخرجون بين الزغاريد – يضيء الخيال – يظهر جنود الفرنساويه يحملون بنادقهم يجوبون هنا وهناك – مينو يظهر علي الشاشه )

]مينو: انا الجنرال مينو

الجنود: وي مسيو

مبنو: حالا لازم نهاجم

الجنود: نهاجم رشيد... او

مينو: مش رشيد ... نهاجم قري

الجنود: نهاجم فلاحين؟؟

مينو: وي (ويعطي اشارة مواصله السير)[

(يدخل 1 و 2 و 6 و 10 )

1: مينو و كتيبته فضلوا ماشيين

2: لغايه ماقربوا من شباس عمير

1و2: لغايه ماقربوا من ابراج الحمام

6 و10: اللي واقف جنبها العرايس في الانتظار

1 و 2: فاكرين الجال راجعيين بالجهاز (دخول المجموعه)

6 و 10: جبتوا الجهاز

10: فين الدولاب... فين السرير

5: مين يقولهم

4: الفرنساويه قابلونا ف الطريق

7: نهبوا كل اللي معانا

9: فلتنا منهم باعجوبه

6: طب وليه زعلانين كده ... اوعوا تحزنوا

10: اوعواتطفوا حبال النور

6: طول ما الحمام بيدور ... الله ف سماه .... مالاقوا في ارضنا الا القبور... فين المهر؟

10: اجمعوا عليه كل المهور

6: وخدوا فوقيه مجوهراتي

11: وخدوا فوقيه حاجاتي

1 و2 و 6 و 10 : وهاتوا السلاح (يتقدم الاربعه الي الامام)

(فجاه يصاب الجنرال مينو ويسقط هو الاخر – ينفعل مينو ويخرج من شاشه الخيال)

مينو: ازاي بلد دي تقاوم ... دي بلد خطير.. باسم الجنرال نابليون اامر انا جنرال مينو .. احرق فلاحين .. احرق شباس عمير

(يخرج مينو في جو دوي وصراخ وانفجارات يوحي بحرق القريه . تقل الاصوات تدريجيا تتقدم المجموعه علي دقات زفه حزينه)

1 و 2: دقوا طبول الزفه يا ولاد

6 و 10: خلوا نور الفرح موجود

3 و 9: زفوا العرايس بين الحمام

4 و 8: بيت العرايس في الجنه مكتوب

5 و 7: وخلوا الحمام يطوف.. خلوا اليمام يدور

1 و 2: ابراجه لسه قايمه ..عليها النور يلالي

الجميع : بيررد لسه كلمه ..... بحبك يا بلادي

المشهد الثالث

(يضاء المسرح فنري مجموعه من الافراد جالسين في وضع متجمد - يظل ذلك في الوضع مستمرا اثناء كلام 1 و 2 – ويبداون المناقشات والحركه عندما ينضم اليهم 1 و 2 – يدخل 1 و 2 )

1 و 2: ايها الساده الكرام ..... مساء الخير

1: اتفرج يا سلام علي الحكايات والروايات

2: ع الفصول والخيال والقفشات

1: هانقدم لكم نوادر وحكم وعبر

2: وحقائق متشخصه فيها الدرر

1: الليلادي في مشاهد

2: تعالي قوام ...يالا شاهد

1: من التاريخ هنحكي حكايات

2: اوعي تقول دا كان وفات

1: هانروح مشوار صغير.. مش هانروح بعيد قوي

2: يادوبك لحد بولاق

1: في زمان الحمله الفرنسيه علي مصر

2: هنروح للناس الحلوة ديه

1: نقعد معاهم ونشوف بيعملوا ايه

(تضيء شاشه الخيال ليظهر عساكر الفرنساويه يحملون البنادق . ومختلف الاسلحه ومنها مدافع .العساكر كثيرة اخيرا يقفون شاهري اسلحتهم في حصار لبولاق )

3: انذار.... انذار..... انذار

4: الفرنساويه حاصروا بولاق

5: عايزنا نستسلم

6: القاهره ماستسلمتش

7: بق بولاق ماتستسلمش

الجميع: مش هانقدر

7: وهو معقول نسلم

8: يا حاج مصطفي مش هانقدر

7: ليه هما الرجاله ماتوا

9: لأ ما ماتوش

10: يا ناس بولاق مافيهاش عساكر تحمينا (يستمر نقاش المجموعه بالاماءات)

1 و 2 : اهال بولاق وعساكر الفرنساويه ... وجها لوجه

(صوت بنادق ومدافع)

3: بدايه الهجوم

5 و 6: بيتي

9 و 10: دكاني

4 و 8: اولادي

7: اموالي

3: (ذاهبا الي منتصف المسرح) العساكر بدأو الهجوم

الجميع: منين

3: اهم.. استخبوا العساكر جايين علي هنا

(يستخبي الجميع بأن يتفرقوا وياخدون اماكنهم – يسكنون قليلا تسمع اصوات طلقات وانفجارات وصرخات)

3 و 9: نستسلم (وهم يجرون ناحيه 7 ثم يأخدون مكان6 و 10)

6 و 10: مانستسلمش (وهم يجرون ناحيه 7 ثم يأخدون مكان 3 و 9)

4 و 5 و 8: نستسلم (وهم يجرون ناحيه 7 ويقفون معه)

2: (مع 1 يذهبان للمنتصف) العساكر الفرنساويه بيدخلوا كل بيت يلاقوة

1: بيقتلوا ... بيحرقوا.... بلا رحمه

(2 يذهب الي حيث تقف 6 و 10 & 1 يذهب الي حيث يقف 9 و 3)

9 و 3: مفيش ف ايدينا حاجه... نعمل ايه

4 و 5: ممعناش سلاح نعمل ايه

8: مفيش وقت نعمل ايه

7: نصمد

الجميع: سبع بولاق

7: نقاوم

الجميع: نقاوم

7: (وهو يتقدم الي الامام) ايه... هي مش بلدنا... مين يتطوع ييجي معايا

8: (يضعون ايديهم علي كتفيه) كلنا معاك

7: وزعوا الرايات

(يتوجه الجميع الي حيث كان7 يقف ويسلمهم والنبابيت سلاحهم الذين سيواجهون به عساكر الفرنساويه يأخذ كل منهم عصاه ويقف ليغني في اعتزاز بعد نهايه الاغنيه تسمع اصوات انفجارات )

الجميع: رايتك دي رايه امون

ولدت جيوش الشمس

واحنا النهارده هنا

واحنا اللي كنا الامس

(مع نهايه الاغنيه تخرج 6 و 10 و 2 ,‘ 1-6 ‘ 10 فيما وراء شاشه الخيال 1 و 2 الي خارج المسرح من يمين ويسار المؤخره )

(يضيء الخيال لنجد ان عساكر الفرنساويه يطاردون 6 و 10 اللتان تخرجان الي المسرح مسرعتان تستنجدان)

6 و 10 : الحقونا .... العساكر بيجروا ورانا

الجميع: عندك الا دول (المجموعه بالنبابيت تتجمع حول 7 و تتجه ناحيه الشاشه)

(6 و 10 تقتربان من المجموعه التي تشكل حولهما دائره وجوههم للخارج-وتتحرك الدائره في مناورة لصد هجوم العساكر يمينا ويسارا ‘ وعند نهايه تحرك الدائرة تختفي 6 و 10- ويتقدم الجميع شاهري النبابيت تجاه الشاشه- يسمع صوت طلقات ‘ يرتمي علي اثارها الجميع موتي)

1: (داخلا مع 2) دم الرجال سال ع الارض اللي حبوها

2: وقدر الفرنساويه مسكوا مصطفي البشتيلي حي

1: وقرروا يموتوه

2: واتفرج يا سلام علي الموته الشنيعه

(وراء شاشه الخيال يقف 7 مكتوفا بالحبال ينهال عليه الرجال ضربا بالنيابيت يقع ميتا علي الارض – يخترق 7 شاشه الخيال ويزحف امامها)

7: وهو ينازع سكرات الموت يزحف اماما

7: احنا الخساره لنا ...و انتي مفيش حاجه

ولو متنا كلنا... ايه يعني ناقص جيل

ياما الدفاتر سجلت... ملايين من المواليد

وفوق ترابك يندفن... خفرع و بعده فريد

يعني مش احنا الاوله... والاخره لسه بعيد

المشهد الرابع

(علي مقدمه المسرح لافته مكتوب عليها (حاره النصاري ) – تبدو علي المسرح معالم حارة في مصر القديمه - الجو ليلا- جنود رائحين غادين يبحثون عن شئ يدخل 1 و 2 في حذر يستوفهما جندي)

الجندي: وقف عندك انت وهي (1 و 2 يتوقفان) فيه حد غريب جه يسكن هنا اليومين دول

1: و احنا ايش عرفنا؟

الجندي: ماتعرفوش ازاي ؟

2: احنا ما شفناش حد

الجندي: (ينظر لهم بارتياب ) طب لو شفتم واحده ست ومعاها اولاد جم هنا ابقوا بلغونا

1 و 2 : حاضر (يخرج الجندي – يواصل 1و2 سيرهما بحذر حتي منتصف المقدمه )

1: في المشهد ده مش احنا اللي هانحكي

2: اهالي حاره النصاري هما اللي هايحكوا

1: احنا هانقوم بدور اولاد صديقه خانم

2: صديقه خانم زوجه احمد عرابي

1: بعد نفي احمد عرابي اصبح مطلوب القبض عليها

2: العساكر بتطاردها في كل مكان

1: لكن مين .... داحنا في حارة مصريه

(تدخل صديقه خانم في خطرات حذرة حتي تصل الي ما بين 1و2 – يدخل عطيه)

عطيه: (بقلق) انتي فين يا هانم .... انا مستنيك من الصبح.. ريقي نشف خايف لأولاد الايه يعتروا فيكي

صديقه: عطيه العزوني

عطيه: تعالي قوام قبل ماحد يحس من اولاد الايه

صديقه: علي فين

عطيه: علي أي بيت في حارنتا ... انتي هنا في امان يا هانم

(ياخدهم الي الخلف ويخرجون – بينما يدخل اهالي الحاره الي منتصف المسرح )

الجميع: احنا اهالي الحاره ... مش خايفين ... احنا متنخانقين

8: يا جماعه مافيش حد احسن من حد

9: الهانم تيجي عندنا نخدمها بعنينا

4: وماتجيش عندنا ليه ؟

3: عندنا احسن

10: مفيش احسن من عندنا

7: امال انا رحت فين

9: لا بأه تيجي عندنا

الجميع: (في جار) هي عافيه... واشمعني انتو احنا احسن... ناخد احنا الاولاد ... وليه ماتجيش عندنا.. وعندنا وحش في ايه.. لا بأه هاخدها انا

5: صلوا علي النبي... صلي علي النبي انت و هي .. شوفوا بأه ... احسن حل الهانم تقعد مع الست دي

10: اهوا دا الكلام دانا اشيلها ف عينيا

7: واحنا كل يوم واحد يتطوع يشوف طلباتها هي و اولادها

الجميع: ماشي (يخرجون)

(تضئ شاشه الخيال لنجد 1و2 نائمان علي جانب وصديقه جالسه تفكر علي الجانب – علي شاشه الخيال يظهر عرابي موجها حديثه لصديقه)

عرابي: صدر الحكم علي بالنفي لجزيره سيلان اوعي تزعلي يا صديقه... انا مش زعلان من الهزيمه في التل الكبير .. انا زعلان من الخيانه ... صديقه انا هاسلم نفسي .. اهربي مع الاولاد .. اختفي ف أي حته في مصر .. ماتخافيش... خدوا بالكم منها يا اولاد

(في الخيال يأخذ الجنود عرابي ويبتعدون ثم يظهر منظر مركب تسير في البحر صوت امواج وصوت يقول : الرحله طالعه لجزيره سيلان – يطفأ الخيال)

صديقه: مش قادره انسي كلامه وهو رايح يسلم نفسه مكانش قلقان عليا ولا علي الاولاد ياتري كان عارف ان هايكون مصرينا في الحاره دي

(تدخل 10 ثم يتوالي دخول الافراد – تنهض صديقه وتنضم اليها اولادها تسير بين الجميع)

10: صباح الخير يا ست الكل جبتلك الفطار

3: وانا جبت لك الخضار

4: ركبتلك الفوانيس

5:وانا ظبتلك الترابيس

10: غسلت لك الغسيل

7: خيطت لك هدوم الاولاد مافاضلش الا القليل

8: فرشت لك الحصير

10: وضبتلك السرير

9: مداس الاولاد في القوالب مشدود

3: كل حاجه البيت موجوده

(يدخل عطيه)

صديقه: روحوا يا اولاد نادوا كوهين الجواهرجي

عطيه: اليهودي

صديقه: ايوه

عطيه: بس دا لو عرفك هاتبقي مصيبه... وبعدين عاوزاه ف ايه؟؟ حد مقصر في حاجه

1: بالعكس داحنا اخر راحه

2: مش ناقصنا حاجه

صديقه: واهالي الحاره كل واحد اتطوع يخدمنا بالحاجه اللي يعرف يعملها

عطيه: امال عاوزاه ليه بس

صديقه: يالا ا ولاد روحوا هاتوه (يخرج 1و2) شوف يا عم عطيه انا هابيع مجوهراتي واشتري حاجه تنفعنا ف وقت الشده تفتكر اشتري ايه؟

عطيه: اشتري لك ارض ف بلدنا

صديقه: هرية رزنه

الجميع: بلد عرابي باشا ...الزعيم

عطيه: ماهو بلدياتي

صديقه: خلاص موافقه (يدخل الاولاد ومعهم كوهين)

كوهين: عاوزني ف ايه يا عم عطيه

عطيه: مش انا اللي عايزك دي الهانم

كوهين:هانم (يفكر)... هو فيه في الحاره هوانم .. الت دي اولمرة اشوفها هي والعيال دي ... اكيد دي زوجه عرابي باشا... انت زوجه عرابي اللي مطلوب القبض عليها (ينزعج الجميع)

5: صباح الخير يا عم كوهين

10: مساء الفل

3: بونجور

4: بنسوار

9: سلام عليكم

8: اتفضل يا عم كوهين

7: يا راجل تعالي اشرب شاي

(ثم تتكون حول عم كوهين حلقه)

الجميع: هه ... عم كوهين

كوهين: جري ايه يا جماعه دانا ابن الحاره برضه

الجمع: بنحسب

كوهين: لا ماتحسبوش اوامرك يا هانم

(تبدأ الهانم في عرض المجوهرات علي كوهين يتقدم 3و8و9 الي منتصف المسرح ويعودون بعد انتهاء كلامهم)

8: صديقه خانم باعت مجوهراتها للصايغ اليهودي

3: الراجل اشتري منها باعلي سعر وزود عليه كمان

4: صديقه خانم عطت ثمن المجوهرات لعطيه العزوني

9: علشان يشتري بيهم كام فدان

عطيه: هاكتب الارض باسمي يا هانم علشان محدش يعرف عنها حاجه

كوهين: خدمه تاني ياهانم

صديقه: متشكرين يا عم كوهين

(يبادر كوهين بالخروج وقبل ان يخرج يدخل جندي يقف امامه كوهين قليلا ثم ينصرف – ينظر الجندي هنا وهناك ثم يتوجه الي صديقه خانم يعترضه 5و7 ويقفان امامه)

5: عيب يا حضرة دي حرمه

الجندي: مطلوب القبض عليها

7: علي دي؟ ليه؟

الجندي: علشان دي زوجه عرابي

الجميع: دي (يبادرون بالضحك ويستمرون فيه لفتره طويله وهم يشيرون الي الجندي ساخرين منه)

الجندي : فيه ايه ياد انت وهو يتضحكوا علي ايه ؟؟

الجميع: عليك

الجندي: ليه؟؟

الجميع: دي اغلب واحده في الحاره

(يتوجه الجندي ناحه 1 و يشير عليه)

الجندي: وده

الجميع: دا كراويه ابن الحلاق

5: ابني

(يتوجهه الجندي ناحيه 2 ويشير عليها)

الجندي: ودي

الجميع: دي مريم بنت تريزه

10: بنتي

(الجندي لا يجد مناصا من الاذعان لكلامهم ويتوجهه للخروج)

الجندي: يا ولاد الابالسه

الجميع: (يجرون وراءه) يا ولاد الايه (ويتضاحكون)

عطيه: ست سنين والهانم جوه الحاره

الجميع: في عنينا

1و2: عايشين ياسماء مستعاره

عطيه: 53 فدان اشتريتهم وكتيتهم باسمي

الجميع: امانه

عطيه: سلمتها بعد 6 سنين

الجميع: لما رجع الزعيم بعد البعاد

3و9و4و8: مشتاق لارض الوطن

5و7و10: للسما.. للنيل...للناس

1و2و6: للهانم والاولاد

(يأخذون الهانم والاولاد ويتوجهون ناحيه شاشه خيال الظل حيث يضئ عند وصولهم)

الجميع: الامانه يا زعيم .. سليمه 100%

(يظهر عرابي علي شاشه الخيال)

عرابي: سلام للاولاد وللحارة المصرية

النهاية

ـــــــــــــــــــــــــــــــــــــــــــــــــــــــ

» مسرحيه مدرسه المشاغبين
» إسلام عمر بن الخطاب : مسرحيه
» مسرحيه لبــــاكثير الملك عبد العزيز لم يمت
» ((القاضي الذكي )) مسرحيه ذات الفصل الواحد
» حكايات الدكتور فرغلى